« Was lang währt wird endlich gut », kann ee bei villen Iddiën a Projetën soen. Dat gëllt och fir d’Aféieren vun engem « Zukunftsfong », engem « fonds souverain ». Zënter Joeren gëtt e vu ville Säiten gefuedert an elo gi Neel mat Käpp gemaacht : bei der Presentatioun vum Budgetsprojet fir 2015, huet de Finanzminister Pierre Gramegna d’Schafen vun engem « Fonds souverain intergénérationnel du Luxembourg » annoncéiert.
Mat him solle Reserven gemaacht (an investéiert) gi fir d’finanziell Zukunft vum Land ze sécheren. Dat ass ee staarkt Signal, besonnesch u déi jonk a nächst Generatiounen. An engems ass d’Manéier schwaach well si zu Laaschten vun deenen Jonken geet.
An de Zukunftsfong sollen all Joers 50 Milliounen Euro aus dem Staatsbudget kommen:
- 25 Milliounen vum e-commerce a 25 Milliounen vun den Accisen um Bensin.
Dës Milliounen ginn u sech am Budget gebraucht well deen am Minus a net am Plus ass. Fir dat Lach ze fëllen, huet de Staat keen aneren Choix wéi Scholden ze maachen. Den Zukunftsfong gëtt also a Moment, an esou laang de Staatsbudget am Defizit ass, mat Scholden bezuelt. Absurd, wann ee wees, dat et mat deem Fong jo graad drëms goen soll, fir de nächste Generatiounen manner Scholden ze hannerloossen.
Mat dëser Decisioun hannergeet d’Regierung d’Philsophie vun engem Fonds souverain. Deen ass nämlech geduecht, fir a gudden Zäiten een Deel vun den Iwwerschëss am Staatsbudget op d’Säit ze leeën fir Zäiten wou et manner gutt geet. An net fir a schlechten Zäiten een Deel vum Defizit op d’Säit ze leeën an doduerch d’Schold weider erop ze sëtzen.
Wat d’Regierung also maachen misst, dat ass fir d’Eischt de Staatsbudget a den Equiliber respektiv nees a de Plus ze bréngen a dann eréicht mam Fëllen vum Zukunftsfong unzefänken. Dat ka natierlech nach eng Rei Joeren daueren an engems et ass eng absolut Konditioun fir dat dee Fong och Sënn mécht.
Nach ass näischt geschitt, well de Fong nach net um Liewen ass. Dat soll am Dezember an der Chamber mam Vote vum Budget 2015 geschéien. Dee Moment ass d’CSV gefuedert, fir d’Manéier vun der Regierung a Fro ze stellen an ze soen wéi mir et gemaacht hätten. Nämlech fir d’éischt an der Chamber ze klären
- wéi d’Struktur an d’Organisatioun vu deem Fong soll ausgesinn ;
- wéi eng Recetten dra kommen ;
- ob de Pensiounsfong an d’Partizipatioune déi Staat an Entreprisen huet, mat integréiert ginn ;
- wéi d’Investitiounspolitik vum Fong soll sinn ;
- wéivill Prozent vum Fong aktiv agesaat ginn ;
- ween dee Fong geréiert an iwwerwaacht gëtt ;
- wéi d’Chamber de Fong kontrolléiere kann;
- dat eréicht da Suen a dee Fong kommen kënne wa de Staatsbudget nees een Iwwwerschoss huet.
Nëmme wann all dës Punkten kloer sinn, schaafe mir een zolidden Fong dee och Sënn mécht ! A nëmme da kann ee vun engem richtegem Zukunftsfong schwätzen. Bis elo ass et héchstens ee zukünftegen Scholdefong !
Hei nach zwou interessant Analysen iwwert der Regierung hiren Fonds souverain :
- SINNER Michèle, Robbing Peter to pay Paul, am Lëtzebuerger Land, Editioun vum 24. Oktober 2014, op de Säiten 2 an 3,
- BUMB Christoph, Schulden auf der hohen Kante, am Luxemburger Wort, Editioun vum 31. Oktober 2014, op der Säit 2.
